Eminem album thar mi duhtui lutuk tan a ni lo

Eminem chuan kar liam ta Zirtawpni khan puanzar lawk loin a album thar  Music To Be Murdered By a tlangzarh thut a, music video 'Darkness' a tlangzarh tel bawk.

A album thara a hla thu ṭhen­khat hian sawi zui a hlawh a, sawiseltu pawh an tam hle. Chung zingah chuan Manchester Mayor pawh a tel. Social media lamah sawizuitu an tam a, a bikin Las Vegas inkahna thleng chungchang hlaa a chham chhuahna 'Darkness' leh Manchester-a Ariana Grande concert-a bomb puak chungchanga a sawina 'Unaccommodating'-te chuan sawisel a hlawh zual.

Ningani khan a Instagram-ah Eminem hian a hla thu sawiseltute chhan letna post-in a album chu mi duhtui lutukte tana siam a nih loh thu a sawi. A hlate chuan a tilungawi lo a nih chuan an tan a ni ve lo tih a sawi. Sawiselna tam hle mah se Music To Be Murdered By hi U.S. Billboard 200 chart-ah No.1 a ni leh ngei dawn niin a lang a, Billboard 200 chart-a album 10 a zawna No.1 nihna dinhmun thlenpui thei record siamtu ni turin Eminem dinhmun hi a ṭha hle.