Lady Gaga-i'n hmeichhe dang a rawn khûm

'Joanne' album a rawn tichhuak a, Lady Gaga ropuizia a rawn lang nghal. Kum 10 chhunga music khawvela hmeichhe hlawhtling ber a rawn ni dêr mai.

Lady Gaga album thar 'Joanne' hi kar liam ta chhung khan copy 201,000 lai an hralh a, Billboard 200-ah pakhatna a luah chiang hle. Gaga hian hmeichhe ropui ve danga kan ngaihte aiin a ropui zawk a ni tih a rawn lantir a ni hawt mai. Tun kum 10 kalta chhunga Billboard album chart-a pakhatna luah thei album nei hnem ber a ni a, Beyonce te, Taylor Swift te a rawn khûm.

Beyonce Knowles leh Taylor Swift te hian pakhatna luah thei album pathum ve ve an nei a, Gaga a rawn lan chuan an dal zo lo. Gaga hian pakhatna luah thei album pali a nei ta. Kum 2010 hnua pakhatna luah thei album ngah ber chu Justin Bieber leh Drake an ni a, album paruk ve ve, pakhatna luah thei an nei. Anni dawtah chuan One Direction leh Kanye West te an ni leh a, album pali ve ve an nei a, he mite hi Gaga hian a rawn nih rual.

'Joanne' album an hralh, copy 201,000 zinga copy 170,000 hi album pangngai a ni a, a bak chu album tlukpui a ni. Kumin chhunga album tihchhuah tawha chawlhkar khat chhunga hralh hnem palina a ni. Chawlhkar khat chhunga hralh hnem ber chu Drake-a 'Views' kha a ni a, copy mtd 1.04 a ni a, Beyonce-i 'Lemonade' chu pahnihna niin, copy nuai 6.53 a hralh a, Frank Ocean-a 'Blonde' chu pathumna niin, copy 276,000 a hralh.

Gospel singer lar leh hlawhtling Chris Tomlin-a album thar 'Never Lose Sight' chu copy 32,000 hralhin paruknaah a lang pha tlat a, hei hian US-ah Kristian an la chakzia a lantir a, chu bakah chuan Chris Tomlin hi secular khawvelah pawh a music-in ngaihhlut a hlawh tih a tilang bawk. Trans-Siberian Orchestra pawh top 10-ah an rawn lang pha tlat.

Billboard 200

"Joanne" - Lady GaGa (201,000)

"Nobody But Me" - Michael Buble (91,000)

"A Pentatonix Christmas" - Pentatonix (60,000)

"The Serenity of Suffering" - Korn (57,000)

"Views" - Drake (38,000)

"Never Lose Sight" - Chris Tomlin (32,000)

"Suicide Squad: The Album" - Various Artists (31,000)

The "Hamilton" Soundtrack - Various Artists (30,000)

"The Ghosts of Christmas Eve" - Trans-Siberian Orchestra (27,000)

"You Want It Darker" - Leonard Cohen (25,000)