Stay Home Live Lounge Dua Lipa leh Chris Martin-te an inlan dawn
Lady Gaga hmalaknain World Health Organization (WHO) leh Global Citizen-te'n ‘One World: Together At Home’ Concert an buatsaih zo chiah a, BBC Radio 1 chuan Ningani hian 'Stay Home Live Lounge' an buatsaih ve leh thung dawn.
UK leh khawvel hmun hrang hranga milar 23-te chu he hunah hian an inlan dawn a, chung zingah chuan Dua Lipa, Chris Martin, Paloma Faith, Ellie Goulding leh Rita Ora-te pawh an tel. Zaithiamte hian Foo Fighters hla ' Times Like These' an sa dawn a, ‘One World: Together At Home’ ang lo takin sum hmuhna atan an hmang dawn thung.
UK bika an sum hmuhchhuahte hi Children in Need leh Comic Relief-ten a inzatin an insem dawn a, heng pawl pahnihte hi Uk ram chhunga hripui leng vanga harsatna tawkte chhawmdawl hna thawktu an ni. Khawvel hmundang aṭanga an sum hmuhte erawh World Health Organisation's Solidarity Response Fund-ah an chhung ang.
Stay Home Live Lounge hi artist-te hian an in ṭheuh aṭanga record-in an film nghal dawn bawk a, Grammy award-winning producer Fraser T. Smith, Stormzy, Adele leh Dave-te pawh lo thawhpui tawhtu chuan a produce dawn a ni.
Tunhnaia boruak nei lian chho tak Dua Lipa chuan Stay Home Live Lounge-a a tel thei tur chu a inchhuan thu a sawi a, Radio 1's Live Lounge presenter Clara Amfo chuan an hla phal taka hmantirtu Foo Fighters chu lawmthu a hrilh ve bawk.