Tun thlaah BTS member-ten military service zo kim dawn

South Korean boyband lar, BTS member-te chuan tun thlaah mandatory military service an zo kim thei dawn ta. La puangzar lo mah se band reunion pawh kan hmuh thuai a beiseiawm hle.

Band member pahnih, RM leh V chuan thla 18 hnuah mandatory military service chu Thawhlehni khan zoin, civil mi an ni leh ta. Jimin leh Jungkook pawhin nimin khan an service hi zoin Yeonchoen-ah an sipai form nen a tawpna atan an rawn inlan ve bawk. Member dang, J-Hope leh Jin chuan nikum khan military duty hi an zo tawh a, an zinga military duty zo hnuhnung ber tur Suga chu June 21 hian a rawn chhuak dawn a ni.