CYMA Football champion lawmnaah Hlana, Siampuii leh Youngfella

LBS Suzuki 22nd Inter Branch YMA Football Tournament 2025 champion Republic Veng chuan vawiin hian ruaipui nen an veng Community Hall No. 1-ah champion an lawm dawn a, zan lamah zai hona a awm dawn.

Zai honaah hian Mizo zai thiam lar chuai thei lo Vanlalhlana bakah tun lai chhuak thar ṭha Youngfella leh Siampuii Ralte te an zai dawn bakah vengchhung zai thiam an inlan bawk dawn.

Republic Veng hian May 31, 2025 Inrinni khan CYMA Football final-ah Bethlehem Vengthlang hnehin an champion a, champion lawmna hi YMA Day lawmna nen an kalpui nghal dawn. Kum danga an tih ṭhin angin YMA Day lawmnaah hian vengchhung zirlai ti ṭha chawimawina an nei bawk ang.