Sangtei Khuptong 'Awm lo ta la' Maktaduai chuangin an thlir tawh
Kumin kumtir lamah khan social media-ah video clip tawite a darh chiam mai a, Sangtei Khuptong chuan warehouse cafe-ah thiam tak maiin ruahṭham loh hla 'Awm lo ta la' tih a sa a, a bulah K. Hminga, Bruce(The Breeze), Eric Chenkual(The Breeze) leh Jonah (Freddy's Nightmare)-te bakah Chali hmuh tur a awm bawk.
Sangtei zai chang khat emaw lek chu social media platform hrang hrangah story leh status-a hmangtu an tam a, a hla pumpui ngaihthlak chak an tam hle tih a chiang bawk.
February 14, Valentine's Day khan he hla phuahtu, K. Hminga chuan a YouTube channel-ah studio version lyric video chu a dahchhuak a, music video puitling la ni lo mah se thlirtu an pung chak a, thla hnih awrh a liam tihah mi maktaduai chuangin an thlir der tawh. Mipuiin an hlut a, nalh an ti tih a chiang.
YouTube-a comment-tu pakhat chuan 'music video mamawh lo pahnih an rawn che dun ta e' tiin a comment a, hei hian ngaithlatute'n Sangtei leh K. Hminga an dahsan zia a tilang chiang awm e.
Hla thu hriat nuam chu
Mizo-ten inngaizawng hla nalh kan tih hi a tlangpuiin inṭhenna lam hla a ni ti ila kan sawi sual tam awm lo e. Mahse he hla erawh hi chu a danglam deuh thung. Hla phuahtu hian a ngaihzawng/a hmangaih chu a tel loa a nun awmdan tur a sawichhuak a, hla thu hriatthiam awlsam tak tak hmangin hla benglut tak a phuahchhuak a ni ber mai.
'Fur khua a thian a, chhimbal an mawi' ang maia a ngaihzawng mawizia, a hla kharna atana a rawn hmangte hi a hla mawina belhchhahtu a ni.
A thluk chhinchhiah awl tak bawk si hian a larna a belhchhah a, a satu Sangtei'n a sa thiam bawk a, ngaihthlak a manhla hle.
Official Music video Kan hmu dawn em?
K. Hminga hian YouTube-a a uplaod-ah hian official Music Video an la tihchhuah dawn thu a tarlang tel a, kan la hmu thuai turah ngai ang. Music video chu an la tihchhuah ngei dawn thu Vanglaini pawh a lo hrilh tawh a ni.
Sangtei sak tura a phuah a ni em?
'Awm lo ta la' phuahtu hian nikum kumtir lamah daih tawh khan he hla hi a phuah a, a tirah chuan Sangteii sak tura a phuah a ni bik lo. Mahse Sangtei'n a han sa chhin a, a aw nen a inhmeh em avangin a sa chhuak turin Sangtei Khuptong a thlang ta tih Vanglaini a hrilh.