ṬHAZUAL GOSPEL Ṭhazual leh Lelte Award best new artist dawngtu Stacy Punte-in kum tawpah ro a rel

Ṭhazual Gospel chart-ah roreltu thar an awm a, chu chu tudang ni loin Stacy Punte a ni a, a hla 'Min Thlahthlam Ngai lo' hmangin chart topper a ni. Zorinsanga Sailo 'A Hmangaihna Aw' chu pahnihna niin Sawmtea 'Lalpa I Chawimawi Ang' chu pathumna a ni bawk.

Kumin hi Stacy Punte tan kum ṭha a ni tih loh rual a ni lo a, a bikin kumtawp lamah Mizo rimawi khawvelah a hming a langsar hle.

Lunglei tleirawl zaithiam leh zai nung ṭhin tak hian Ṭhazual Award leh Lelte Award 2020-ah khan Gospel huang chhunga zaithiam lar thar ṭha berah thlan a lo ni ve ve tawh a, tumahin an sawiselin a rinawm lo a, an sawisel lo mai ni loin awm an ti hliah hliah zawk tih a hriat. Chutah chuan a la duhtawk mai lo a, kum 2020 Ṭhazual chart hnuhnung berah pawh ro a rawn rel leh a, a hla, chart a mikhual tawh lo tak 'Min Thlahthlam Ngai lo' hmangin No.1 a ni.

Stacy Punte hian kum thar lamah hla thar mawi tak tak min hlui chhunzawm zel turah beisei ila, kan beisei thlawn em lo ang chu. Kum thar lamah chart topper a la ni chhunzawm zel dawn em tih hriat a chakawm tawh hle.

Chart-a pahnihna chu Ṭhazual award best male artist gospel Zorinsanga Sailo 'A Hmangaihna Aw' kha niin ani hi dinhmun ṭha lehzuala ding tur pawhin a hmabak a eng hle a ni.

Pathumna chu Lelte award pali lai la thei Sawmtea Chhangte 'Lalpa i Chawimawi Ang' a ni thung a, ani pawh hian hma a rawn sawn chho chak hle bawk.

Baby Malsawmtluangi 'Ka kawng hruaitu' chu palinaah a rawn inhlangkai ve leh bawk a, Mapeka'n 'Ka Banah Min Kai rawh' hmangin top 5 a rawn khar a ni.