Women of the Year zingah Bono a tel!
Hmeichhe zingah mipa hming a lang dawn! teh tlat chuan! Glamour chanchinbuin Women of the Year a tarlan tur zingah U2-a an frontman Bono a lang dawn a, he list-a mipa lang hmasa ber tur a ni.
Glamour chanchinbuin Women of the Year list-a Bono an dahna tur chhan chu mi dang≠te tana a beih nasat vang a nih thu an sawi a, amah Bono pawh a lawm hle. He list-ah hian nunphung leh eizawnna kawng hrang hranga hmeichhe chawimawi phute hming tarlan a ni ṭhin a, Bono hi a hnathawh ṭhat avangin list-ah hian a lang ang.
Bono chuan, "Hemi thu ka hriat ve leh hian ka nupui (Ali Hewson) ka titipui nghal a, ka phuin a hria em tih ka zawt a, ani chuan a hriat thiam mai bik loh thu sawiin, midangte tana hna ka thawh nasat thu a sawi tel a, amaherawhchu he list-a ka lan ka phu leh phu lohah chuan sawi tur a hre mai bik lo," a ti. Bono hian One campaign a kalpui a, heta a thupui pakhat chu 'Poverty is Sexist' tih a ni a, hei hian hmeichhia leh naupang tam tak ngaihven a hlawhtir lehzual hle. Kum 2015 aṭang khan retheihna doin nasa takin hma a la a, hmeichhiate dinhmun chawikanna kawngah pawh hna a thawk nasa hle.