India Film Festival-ah Mizo film 2 thlang

India Independent Film Festival 2025 leh International ART Film Festival of India-a film tih chhuah tur zingah Mizo film, TC Vanlalzaua siam thlan tel an ni.

‘This Is Mizoram; A Traveler’s Paradise’ chu India Independent Film Festival 2025 neih turah ‘Indian Cinema Competition Section- Documentary’ category-ah telh a ni a, August 23 ah screen a ni ang. ‘ROMAWII’ chu International ART Film Festival of India-ah ‘Indian Cinema Competition Section- Short Film’ ah telh a ni thung.

TC Vanlalzaua hi Mizo film industry-a mi hmasa pawl a ni a, film eng emaw zat a lo siam tawh a, heng zingah hian Lenmawii, Luahloh Lungdi leh Nicky Cruz te pawh an tel. National School of Drama, New Delhi aṭanga zir chhuak niin, film bakah audio drama leh stage drama lamah sulhnu eng emaw zat a lo nei tawh bawk.