Fashion Fiesta Thlasik thuam

Tun ṭum chu thlasik rim a nam ṭan ta bawk a, a tu a te tan pawha hman ṭangkai theih tur thlasik khaw vawha kan Wardobe-a kan telh ngei tur tarlang dawn ila. A vai hian kan nei kim thei lo a nih pawhin heng zinga panga tal hi kan kawl anih ngat chuan kumin thlasik chu kan ṭhing lo hrim hrim.

1) Skinny Jeans : Ṭhalai a tu a te pawhin eng rawng emaw ber chu kan kawl vek awm e. Kan neih sa, kan uar sa ni tho mah se taksa fit thlapa hak anih ṭhin avang hian a hnawk lovin a lang ṭawp lo. Chu bakah Boot rawng sang emaw hniam emaw Belerina pheikhawk te nen pawh hakpui ila adik thei vel vek. Chhun lamah flats nen, zan lamah pumps rawng sang nen a hak kawp theih ve ve. Amaherawhchu, thlasik lai chuan rawng tak lam ni thei se.

2) Cashmere Sweeter : Hetiang kawrlum hmapum lum zet mai, simple tak mai hi pawnfen nen a ni emaw, kekawr tlen nen a ni emaw, leather kekawr nen pawh nise a hak kawp theih vek a, a chhungah kamis kan ha a ni emaw, pawn lamah Jacket leh Overcoat kan inbel anih pawhin a inhmeh thei vek a ni. Chuvangin heng kawrlum simple rawng solid tawp ang chi ho hi pahnih khat kawl hi a pawi miah lo.

3) Statement Coat : Thlasikah chuan lum ṭhat a pawimawh viaunain a tu a te pawhin nalh loh kan hlau vek. Chuvangin lum bawk si nalh bawk si kan thlan thiam a pawimawh. Kan inhak thuah ṭun anih phei chuan a pawn lang bera kan inbel hi mite mit latu anih miau avangin rawng lar, langsar leh dangdai deuh hlek te, kan thawmhnaw plain lutuk chei nan hak a inthlahrunawm loh.

4) Knee length Boots : Lum bawk si, tunlai bawk si, thlasik atan duhthusam, tlema ria leh cher sang te chauh inbel tur emaw lo ti suh. Hak ngam phei chuan kekawr tlawn chung ringawt lo deuhah, pawnfen chhing nen a ni emaw kawrfual mal chen nen te pawh inbel pui ila kan tisual tam awm love. Leather a ni emaw suede a ni emaw a dum hi a safe ber. Amaherawhchu, lansarh deuh hlek duh tan chuan a uk emaw a senduk emaw, taksa rawng lamte bun ta ila a pawi lo khawp ang.

5) Kawrlum phiar fual : Mimal tak pawha ka ngainat Zoramah phei chuan vanneihthlak takin secondhand-ah te nalh tak tak lei tur a awm ṭhin avangin kan vannei hle. Heng kawrlum phiar fualte hi mal lai chen a ni emaw ngal chen a ni emaw, a chhunga chÍn a nuamin, achhungah thawmhnaw dang inbel pawh ni ila a inthlahrunawm loh. A tunlaiin a lum nuam tho bawk si. Thlasik mamawh ṭha tak a ni.

6) Wrap Scarf/Blanket Scarf : A hming aṭang reng pawh hian eng ang nge anih a hriat theih thuak awm e. Kawrlum leh Jacket chungah shawl bah ang deuh hian thlasik khawvawh lai tak tak chuan han bat hnuang mai ila a inthlahrunawm loh. Hak a nuamin a thengthaw ṭha phian bawk.

7) Turtle neck top : High neck kan tih mai kawrlum nghawng sang, adik takah chuan sang satliah mai ni lovin a inthlep let te hi turtle neck tih deuh kher a ni ṭhin. Khawi hmunah pawh eng thawmhnaw nen pawh inbel pui theih vek a nihna hian a ṭangkaizia a tilang chiang hle. Ṭhenkhat phei hi chuan ngainat zual bik kan neih ṭhin avangin kawr chhungah thlasik chhunga hak deuh tawp kan nei ṭhin. Heng atan hian a ṭangkai phian bawk.

8) Leather Jacket : Kum tinin kan uar thar zel emaw ni chu aw tih turin kuminah a thar lei mah ila a kum lehah tlema design dang deuh a lo chhuah chuan neih leh tur emaw kan tih khawpa thlasik chhunga kan thawmhnaw ngaihsan ber a ni hial awm e. A lum chu thu hran, design eng vak mah awm lo mah se leather jacket hi chuan mi a chei ve hrim hrim. Khawvel changkang zelah a dum chauh lo deuh, a senduk, a uk buang leh a hringte chenin hak tur kan hmu ta a, a design lah a hmaa zipper chhukthla tawp aṭangin bikers hoin an hak ni awm taka rivets leh studs tea chei hmuh tur a awm tawh. I ngainat zawng ilo thlang ve tawh mai dawn nia.

9) Ankle Boots (Ngal chen Boot) : Mimal taka ka ngainat em em, thlasik a min ti incheitu mai piah lamah a lumin khawi hmunah pawh chhuah vahnaah a ni emaw, Biak In chhungah ngei pawh bun a inthlahrunawm loh. Tunlaia kan hmuh chunky heels ho phei hi chu a heel a chhah miau avang hian bun a nuamin tlema sang ve det hian bawp a ti lang sei bawk a, kekawr nen a ni emaw, pawnfen nen emaw, kawrfual nen pawh leather-a siam te, suede te pawh hmuh tur a awm tawh a, bun duhna tura zirin thlan tawh mai tur a ni.

10) Uggs : Online Shopping ka enkual ve china mite thlasik atana an inpuahchahna nasatna ber nia ka hriat Uggs boot ho hi tleirawl, nutling, pitar thlenga inbel theih anih avangin thlasikah chuan kawl ve ngei ngei chi. Ina awm mai maia bun atan emaw khawpui fan kual, len chhuahnaah a inbel theih vek.

Kumin thlasik hian kum dang zawng aiin velvet leh suede lam thawmhnaw a ni emaw pheikhawk pawh nise kan uar hle turah lo ngai rawh.

Tluangpuii Hmar

Instructress

Vakiria Institute of Fashion Technology