Doctor Strange a hit

November thla kan kai a, movie ṭha kan hmu leh ṭan. Box office lamah pawh sum lut a tam chho leh a, kar tawp chhung khan Doctor Strange chuan pakhatna luahin USD mtd 85 zet a lalut.

Doctor Strange hi Marvel-a superhero film tho a ni a, Benedict Cumberbatch-a channa a ni. A film siamtute hian a hlawhtlin an ring tho nachungin an rin aiin a che ṭha. He film hi USD mtd 70 vel lalut tur a, rin a ni a, an rin aiin USD mtd 15 zetin sum an lalut hnem. He film hi November thlaa movie tihchhuah zinga sum lalut hnem 13-na a tling pha. Marvel movie tihchhuah zinga pakhatna luah thei 14-na a ni a, Marvel hian comic behchhanin movie 14 an tichhuak tawh a, hengte hian box office-ah pakhatna an luah thei vek.

Pahnihna hi Trolls a ni a, animated movie a ni a, musical film a ni. He film-ah hian Anna Kendrick leh Justin Timberlake te pawhin aw an thawh. Kar tawp ni thum chhung khan USD mtd 45.6 lai a lalut. Pathumna hi Mel Gibson-a direct movie, Hacksaw Ridge a ni a, USD mtd 14.8 a thawk chhuak. He film hi film ṭha tak a ni a, Kristian inzirtirna nena kalkawp film, Indopui II hunlai behchhana siam a ni.

Pakhatna luah tawh Boo! A Madea Halloween chu palinaah a awm a, USD mtd 7.8 a la lalut thei a, Inferno chu panganaah awmin USD mtd 6.3 a lalut bawk.

Box office movies

“Doctor Strange” - $mtd 85

“Trolls” - $mtd 45.6

“Hacksaw Ridge” - $mtd 14.8

“Boo! A Madea Halloween” - $mtd 7.8

“Inferno” - $mtd 6.3

“The Accountant” - $mtd 6

“Jack Reacher: Never Go Back” - $mtd 5.6

“Ouija: Origin of Evil” - $mtd 4

“The Girl on the Train (2016)” - $mtd 2.8

“Miss Peregrine’s Home for Peculiar Children” - $mtd 2.1