Billboard 200: Top 10-ah Morgan Wallen album 3 an lang

Billboard 200 album chart thar berah American country pop singer, Morgan Wallen chuan a studio album thar ber 'I’m the Problem' hmangin No.1 a hauh leh. Hei bakah hian Top 10-ah Wallen hian a album dang pahnih a lanpui bawk.

'I’m the Problem' hi May 31 khan ti chhuakin, tlangzarh a nih aṭang hian a zawnin kar nga chhung chart thununtu a ni tawh. Artist mipa album zinga kar nga chhung No 1 hauh thei hmasa ber a ni. He album-ah hian hla 37 awmin streaming platform lamah a che ṭha zui zel a, kar hmasa chhung khan 229,99 million on demand official stream a nei pha a ni.

A kar nganaah pawh 'I’m the Problem' hian equivalent album unit 186,000 hmu pha lehin, Taylor Swift album 'The Tortured Poets Department' dawta kar nganaa equivalent album unit nei tam ber a ni. Wallen album dang pahnih 'One Thing at a Time' chu equivalent album unit 40,000 neiin panganaah leh , 'Dangerous: The Double Album' chu equivalent album unit 32,000 neiin pakuanaah an lang tel bawk.

K-pop boy band ATEEZ chuan 'GOLDEN HOUR: Part-3' chu an album zinga Top 10 lang thei pasarihna ni turin No.2 ah an lanpui a, 4.07 million on-demand official stream nei pha in equivalent album unit 105,000 a nei bawk. Pathumnaah Lil Tecca album 'DOPAMINE' langin, a album zinga thleng sang ber leh Top 10-a lang thei pangana a ni a, equivalent album unit 48,000 a nei. Chart tharah hian vawi eng emaw zat No.1 lo hauh tawhtu leh chart mawitu tih theih, SZA album 'SOS' chu rawn lang lehin equivalent album unit 47,000 neiin palinaah a awm.

Chart tharah hian Sabrina Carpenter, Brandon Lake, Kendrick Lamar, bakah PARTYNEXTDOOR and Drake thawhdunna album-te an lang leh thei bawk.