Zaninah Zira Hnamte pual 'Zo Awi Zunzam'

Doordarshan Aizawl chuan zanin hian 'Zo Awi Zunzam' programme a buatsaih leh dawn a, hranghlui zaithiam lar Zira Hnamte pualin hun hman a ni dawn. Zaithiam ṭha tak takten Zira Hnamte hla phuah leh a hla lo sak tawhte an rawn sa dawn a ni.

Zanina Zo Awi Zunzam hun hman tur hi DD Mizoram TV channel-ah leh DD News Mizoram YouTube channel-ah live-a pek chhuak a ni ang.

Zira Hnamte hi kum 1952, April 23 khan Darzo khuaah a piang a, unau pakua zinga a palina a ni. Zirna lamah PU Science a zo. Kum 1977 khan Rothangpuii nen inneiin fa pali an nei, hnathawhna vangin Aizawlah an in bengbel zui a ni. Kum 2014 November thlaah heart attack a nei a, he natna vang hian kum 2020 November, 10 khan a boral a ni.

Rimawi lamah sulhnu a nei ṭha hle a, Mizoram beat & music contest,1979-ah Buizova Trophy a dawng a, 1980-ah Best male vocalist a dawng leh bawk. All India Radio-ah 1975 khan artist ni ṭanin, Mizoramah a awm zui vangin All India Radio, Aizawlah artist a ni chhunzawm leh a ni. 'B' high artist niin radio-ah hian hla 170 bawr a khung a, audio album cassette 8 a siam bawk. Hla phuah thiam tak niin lengzem, lenglawng leh Pathian hla 80 bawr a phuah bawk a ni.