Covid-19 dona atan Milarte an che chhuak nasa

BBC 1 chuan Ningani zan khan Covid-19 dona kawnga hmalakna tur sum dehchhuahna turin 'Big Night In' hun an hmang a, darkar thum chhung hun hmangin hetah hian $mtd 67 lai an hmu chhuak hman a ni.

He hun hi  Lenny Henry, Zoe Ball, leh Paddy McGuinness-te chuan an host a, Britain milar eng emaw zat an inlan a ni. An sum hmuhchhuahte hi BBC-in charity lama a thawhpui Children in Need leh Comic Relief-te tan an hmang ang.

Vantlang pawisa thawhkhawm aṭangin $33,844,327 an hmu­chhuak a, UK sorkarin a thawhbelh nen  $67,688,654 lai an hmuchhuak ta a ni.

He hunah hian Duke of Cam­bridge pawh a inlan a, Peter Kay, Catherine Tate leh Little Britain duo-te pawh hmuh tur an awm. Doctor Who actor-te pawh inlanin kum 50 liam ta chhunga Doctor Who star-te chuan doctor leh health worker tak takte hnenah lawmthu an sawi.

BBC Big Night In programme hnuaia sawi hlawh ber zinga mi chu Live Lounge Allstar-te an ni a, a hmaa puan lawk tawh angin  anni hian Foo Fighters hla 'Times Like These' an cover a ni.

Britain-ah mai ni lo, khawvel huap zaithiam leh musician lar tak takte'n 'Times Like These' an in aṭang ṭheuha an sa hian thlirtute beng a verh hle tih a hriat.

Tunlaia boruak nei lian ber zinga mi Dua Lipa, Coldplay front­man Chris Martin, Ellie Goulding, Jess Glynne, Paloma Faith, Mabel leh Rag 'N' Bone Man-te pawh zai zingah hian an tel.

Foo Fighters frontman leh Nir­vana drummer hlui ni bawk Dave Grohl ngei maiin a rawn telpui hian an hla hlutna hi a tizual.