Zaninah 'KHAWNGE?' a en theih dawn ta

Conflate Video Production kutchhuak, Mizo film thar 'Khawnge?' tih chu zanin, June 27 zan hian Saikuti Hall, Lungleiah tlangzarh a ni dawn. Lersia Play-ah en theiha chhawp chhuah a ni nghal bawk ang.

'Khawnge?' film script hi B. Lalbiakvela ziah niin a direct nghal bawk, Cinematographer leh editor hi Ngaihawma Fanai a ni. Mizo Film Award-a Best Actress la thei Rosangpuii Ralte bakah Sangtea Chhangte chu a changtute an ni dawn a, anni bakah Deborah Ralte leh David Zawma, Sena Ngente, Lalawma, Elvis leh Pinky Zorempuii te an in lan dawn bawk.

He film hi Lunglei leh a chhehvel thingtlang khaw ṭhenkhata chengte thil tawn chanchin niin, pa ber damlo damdawi lei tur te, mahni chhungkaw ramri buai chingfel tur leh Darsih khaw VCP ten dawr pakhata thil an lei naa an thil lo ṭheuh an khai hawn tak avanga 'Khawnge?' tia an buai chhoh dan chungchang a ni.

Conflate Video Production hian film ṭha tak tak ‘Dengi i love you’, ‘ Nukawki Pasal’, ‘Mokawr’ leh ‘Thih leh Dam part 1&2’ te lo ti chhuak tawhin an hit hlawm hle. An film thar pawh hi a hma amite ang bawka en nuam leh hmuhnawm tak a nih leh ngei a rinawm.