Zaninah 'Darthlalang' film tlangzarh dawn

Mizo film thar, 'Darthlalang' chu zanin, June 28 zan hian Vanapa Hall-ah tlangzarh a ni dawn ta a, zaninah vek OTT platform thar AiduPlay-ah Rs 200 a lei theih tura chhawp chhuah a ni nghal dawn bawk. AiduPlay hi Play Store leh App Store-ah download theihin a awm.

'Darthlalang' film hi BR Studio produce niin, Mizo film industry huangah pawh sulhnu ṭha tak tak lo nei tawh Johny Zote ziah leh direct a ni. He film-ah hian mi lar inlan tur an awm nual. Zai leh lemchan lama sulhnu nei ṭha tak Jenny Jathang kan hmu dawn a, Mizo model lar leh chhe lo Hlui Sailo leh Bobita Chetri-te lemchan hmuhnawm tak kan en thei dawn bawk. Mipa lamah Lianpuia leh Laraw Colney te bakah mipa model zinga lar chho ber pawl ni mek Kevin Malsawmtluangate an in lan dawn bawk a, a changtute vang pawha en chakawm tak tur a ni nghal.

He film-ah hian ṭhalai te'n a lang leh lang lo lama harsatna leh chona hrang hrang an hmachhawnte tarlanna a ni. Chhungkuaa tihduhdahna an tawrh te, rilru lama harsatna an tawhte bakah STD te thlengin a hrutkual kim hle. Ṭhalaite bakah kum upa leh naupang lam thleng pawha en theih tura duan a ni.