Bond Girl Gemma Arterton a inchhir

Lemchan thiam hmeichhiate zingah James Bond film-a chang pha chu inchhuan phahna tham nia ngaih a nih laiin, kum 2008-a Bond Girl a chang, Gemma Anterton chuan a film chan avang hian a inchhir thu a sawi ve thung. 

Kum 2008-a James Bond film, 'Quantum of Solace'-ah Gemma Arterton hi intelligence operative Strawberry Fields lemah a chang a, hei hi lemchan khawvela a dinhmun siamtu pawimawh tak ni chho mah se, kum 10 chuang hnuah he film-a a lo chang hi a inchhuang lo hle tih a sawichhuak. 

'Hansel and Gretel : Witch Hunters' actress Arterton chuan Bond movie-te hi an sexy hlawm hle tih sawiin, a role chan avang hian sawisel pawh a tawk nasa a, mahse hetih lai hian a retheih avangin Bond girl chan hi a remti tih a sawi. "Tun thlengin Quantum of Solace-a ka chan avang hian sawisel ka la tawk fo. Mahse hetih lai hian kum 21 chauh ka ni a, student loan rulh tur ka nei bawk a, Bond film a lo nih bawk avangin chan ka remti ta mai a ni," a ti. Mahse a lo upat deuh hnuah James Bond film-a Bond girl te lantir an nih danah thil dik lo tam tak a awm tih a hriat chhoh thu a sawi a ni.