"Fast and Furious 11"ah Paul Walker kan hmu leh dawn?

Racing car leh super car ngainatute leh ngaina ve lem lo pawhin an ngaihven, 'Fast and Furious' film 11-na tur tih chhuah tum a nih thu 'FnF' star Vin Diesel chuan Inrinni liam ta khan fans hmaah sawiin, Paul Walker pawh tih lan leh a ni dawn tih sawi a, fans lam thawm pawh a ṭha hle.

Diesel hian Pomona, California-a car ngainatute puala buatsaih 'Fuel Fest' ah he thu hi a sawi a, April 2027 a tih chhuah hman tum a nih thu a tarlang nghal.

Fast and Furious film hi kum 2001 aṭanga tih chhuah ṭan tawh kha niin, Ken Li article ziah Racer X behchhana siam a ni, dan phal loh 'street racing' lam thlurbingna a ni. He franchise film hnuhnung ber, 'Fast X' chu 2023-a tih chhuah tawh niin fans lam ngaihhlut a hlawh hle bawk.

Film thara Paul Walker tih lan leh dan turah hian digital hmanga tih a ngaih tur thu pawh tarlan a ni bawk. Hetih laiin 'Fast 11' hian film hnuhnung ber 'Fast X' kha a chhunzawm dawn em tih a la chiang lo thung.