Inter Branch YMA Quiz Competition 2025 ṭan

Inter Branch YMA Quiz Competition 2025 chu nimin khan neih ṭan a ni a, Central YMA Committee Room-ah Elimination Round buatsaih niin, YMA branch 58 an tel.

YMA branch-te quiz-a intihsiakah hian branch pakhat aṭangin aiawh mi pahnih zel tel theih a ni a; Elimination Round-ah hian multiple choice question hmanga zawhna siam niin, branch aiawhte chuan ziakin (written) zawhna an chhang.

Elimination Round aṭang hian intihsiakna tak tak hmachhawn turin branch 27 an tling a; July 3, Ningani zan dar 8-ah Ignite Studio-ah an intihsiak ṭan dawn a, July ni 4 leh ni 8-ah chhunzawm a ni ang. YMA branch 27-te hi round khatah branch pathum zel an intum dawn a, zan khatah branch pakua an intum hman tura ruahman a ni. Intihsiak mek branch-te'n in lam aṭanga phone call hmanga an lo chhân ve tur zawhna siam a ni dawn a, chu chuan mark a pu tel dawn.

Semi final chu July 9, 2025 zanah neih a ni ang a, final lut branch pathumte July 11, Zirtawpni zanah an intihsiak ang. Semi final chinah visual round a awm dawn a ni.

Inter Branch YMA Quiz 2025 hi CYMA Youtube channel-ah live-a pek chhuah a ni dawn a; pakhatnain Rs 1,00,000 leh nomawi an dawng ang.