Billboard 200: Morgan Wallen khum zo an la awm lo

Billboard 200 album chart-ah Morgan Wallen khum zo an la awm lo a, a studio album thar ber 'I'm The Problem' chuan equivalent album unit 177,000 nei lehin a kar rukna atan No.1 dinhmun a rawn hauh leh.

'I'm The Problem' hi May 31-a tih chhuah a ni a, artist mipa zinga kar ruk chhung No 1 ni thei hmasa ber a ni ta. Album-ah hian hla 37 awmin, on-demand stream 168,500 a la nei pha a ni.

Benson Boone sophomore full-length studio album thar 'American Heart' chu tih chhuah a nih karah equivalent album unit 61,000 neiin pahnihnaah a rawn lang nghal a, on-demand official stream 30,000 a nei. 'American Heart' album-ah hian hla 10 awmin, streaming service hrang hrang bakah digital download, CD, deluxe CD box set leh T-shirt a awm bawk.

Karol G album 'Tropicoqueta' chuan equivalent album unit 57,000 neiin pathumnaah a rawn lang bawk. He album hi June 9 khan streaming service hrang hrangah dah chhuah niin, June 20 khan digital-a download theihin chhawp chhuah leh a ni. SZA chuan a album 'SOS' a dinhmun ngai palinaah la awmpuiin Morgan Wallen chuan a album dang, 'One Thing At a Time' chu Top 5-ah a lanpui bawk a ni.