Apple Music-in LA-ah studio thar siam dawn

American multina-tional corporation leh technology company lian Apple chuan Los Angeles-ah an company music division Apple Music studio thar, square feet 15,000 a zau leh chhawng thuma sang an sak tur thu an puang. Studio thar hi nipui chhunga hawn hman tum a nih thu an tarlang tel bawk. Apple hian New York, Tokyo, Berlin, Paris leh Nashville-ah te studio hi an nei mek a ni.

Apple Music hi audio leh video streaming service niin company hnuaiah hian service hrang hrang - internet radio station, Apple Music 1, Apple Music Hits, Apple Music Country, Apple Música Uno, Apple Music Club, leh Apple Music Chill hmangin ram 200 chuangah darkar 24 chhung service an pe chhuak mek bawk.

LA a studio thar an din bakah hian hmalam hunah studio dang pawh siam belh tum a nih thu an tarlang. Apple music kum 10 tlin lawmna pual hian 'top 500 most-streamed songs over the last 10 years' chu Thawhlehni aṭang khan ṭanin, nitin hla 100 zel tarlan a ni dawn a ni.