Playstation 'Helldivers 2' Xbox-ah awm ve dawn

Gaming huanga thawm nei lian Sony Interactive Entertainment kut chhuak Playstation chauha awm ṭhin 'Helldivers 2' games chu an elpui gaming brand lian tak, Microsoft kutchhuak Xbox gaming console-ah August aṭang hian khelh theih a ni ve dawn ta.

Playstation leh PC chauha khelh theih third-person co-op shooter, Arrowhead Game Studios siam, Playstation-in an publish chu Xbox series X leh S ah te khelh theih tura tih a ni ve ta. He game hi Playstation leh PC chauha khelh theih turin February 2024 khan tlangzarh a ni a, a che ṭha nghal hle. Xbox-a khelh theih a nih tur chungchang hi 'Helldivers 2' game director Mikeal Erikson chuan Ningani khan thuchhuah siamin a tarlang a,," Gamers ṭhahnem takin Helldivers game hi huang zau zawka khelh theih turin mi an ngen ṭhin a, an beiseina kan ti hlawhtling thei tur hi kan phur tawh hle a ni" a ti.