Saka studio album pahnihna a chhuak dawn hnai

Mizo Idol Season 7 aṭanga Zoram mipuiten kan hmelhriat, Vanlalngaihsaka (Saka) chuan a studio album pahnihna a ti chhuak dawn hnai ta.

Saka hian kum 2023 khan kum 19 mi lek niin a studio album hmasa ber, ‘Suangtuahna Mawlmang’ a lo ti chhuak tawh a, he album-ah hian Mizo Idol Hmangaihi nena an sak, 'Ka chelh ding lo'ng che' tih pawh kha a tel a ni. Lehkha zir chungin music lam pawh a buaipui chho zel a, July 18 hian a studio album pahnihna, ‘Thlasik Kawng’ chu a ti chhuak leh thei dawn ta.

He albumah hian hla pakua a awm dawn a, ama phuah vek a ni. Bzi Tochhawng leh Dear Joe a thawhpuina turte pawh a tel. Audio engkim- music, recording, mixing &mastering zawng zawng hi Zuala Jahau (Aeris Records) kutchhuak a ni dawn a, video lam hi WowV Production kutchhuak niin artwork leh branding hi Dawlrem Creatives kutchhuak a ni thung dawn.

A album release pual hian The Warehouse Cafe, Folkland Park ah show neih a tum a, Mizo artist ṭha tak tak te pawh an rawn inlan dawn a ni.