TikTok-in App U.S version siam dawn

Social media platform lar, TikTok chuan United States-a an platform hmangtute tan version thar an siam dawn tih an puang. Chinese internet company Bytedance siam social media app hian US-ah March 2026 hian an platform hman mek hi tih tawp an tum tih an puang tel bawk.

US president Donald Trump chuan Fox News-ah mi hausa tak pawl pakhatin short-form video platform chu lei an duh tih a sawi hnuah TikTok chuan US version siam a nih tur thu hi a puang a ni. September thla tir lamah hman theih tura peihfel hman an tum tih an sawi bawk.

Social media app chuan thuchhuah siamin, America-a app hmangtu maktaduai 170 chuang leh U.S -a sumdawnna atana hmang mi maktaduai 7.5, he platform-a innghatte tana TikTok a awm chhunzawm zel theihna turin US bik chauha hman tur version an siam dawn a, President Trump-a kaihhruaina leh a thlawpna avanga an lawmthu an ziak bawk a ni.