UK chart-a roreltu kum 99 mi Captain Tom Moore

UK single chart-ah thil danglam tak a thleng a, kum 99 miin ro a rel tlat. UK single chart-a No.1 ni thei upa ber record a siam nghal bawk.

Captain Tom Moore leh Michael Ball zaidunna chuan kar eng emaw zat rorel tawhtu  Canadian superstar The Weeknd chu an nek chhuak a, dinhmun ṭha ber an luah a ni. 

'You'll Never Walk Alone' an cover dun chu copy 82,000 hralhin The Weeknd an nek chhuak a, chumai a la ni lo, an hla cover aṭanga an sum hmuhchhuah zawng zawng hi  NHS Charities Together fund-ah an pe dawn.

Tom Moore chuan chart-a No.1 a ni chu a tu leh fate chuan an awih theih loh thu a sawi hial a, an hla leisaktute hnenah lawmthu sawiin,"He thilah hian kan ṭangrual a, in mi thlawpna zawng zawng avangin ka lawm hle a ni. Hei hian 'you'll never walk alone' tih chu a finfiah a ni," a ti.

Captain Tom hian Ningani lo awm turah hian kum 100 a tling tawh dawn nghe nghe a, chart No.1 a nih lai ngei hian kum 100 a tling dawn tihna a ni. A awmzia chu, record thar a siam leh dawn tihna a ni a, UK single chart-a kum 100 mi No.1 ni thei hmasa ber a ni leh nghal dawn.

Tom hian Sir Tom Jones record lo siam tawh chu khum­in, Tom Jones hian kum 2009 khan 'Islands In The Stream' a cover hmangin UK single chart-a No.1 ni thei upa ber record a lo siam tawh a, khatih hunlai khan kum 68 a ni.

A zaipuipa Michael Ball chuan an record siam chu thil danglam tak nia sawiin, a career-a a inchhuan ber ṭum a nih thu a sawi hial bawk.

A hming tak Thomas Moore hi World War II veteran a ni a, Indopui II-na hunlai khan India leh Burma-ah hun a hmang ber a, Indo zawh hnuah khan  concrete company-ah  managing director hna a thawk leh a ni.

Khawvel puma hripui leng dona kawnga a hnathawh avangin hriat a hlawh a,  NHS Charities Together tana pawisa peipunna turin a huan vawi 100 hel chhuah a tum a, hemi hmang hian £1,000 hmuhchhuah a tum. Hei hian mi rilru a hneh hle a, mi 8,00,000 chuangin a  fundraising page-ah pawisa thawh tawhin heng zingah hian Duke of Cambridge pawh a tel a, £mtd 30 dawn a hmuchhuak tawh.

A huan vawi 100 a hel chhuah lawmna atan hian 'You'll Never Walk Alone' hi an record a, darkar 48 chhung lekim copy  36,000 a hralh hman a ni.

BBC Radio 1 programme 'Stay Home Live Lounge'-a British milarte'n  Foo Fighters hla 'Times Like These' an cover chu UK single chart No.5-ah a invawrh nghal.

Captain Tom Moore hla cover ang thoin hei pawh hi charity puala an siam a ni a,  Dua Lipa, Hailee Steinfeld, Anne-Marie, Jess Glynne, Sean Paul, Chris Martin, Bastille leh AJ Tracey-te'n an record ho a ni a, a hit hi a mak hran lo hle thung.

UK single chart-a No.1 ni thei upa zual Top 5

ArtistHlaKum

Capt Tom MooreYou'll Never Walk AloneKum 99 

Sir Tom JonesIslands In The StreamKum 68 

Louis ArmstrongWhat A Wonderful WorldKum 66 

Tony ChristieIs This The Way To AmarilloKum 61 

Frank SkinnerThree Lions (2018)Kum 61