CADS batch hnihna lak luh a ni

Central YMA hnuaia ruihhlo do pawl, Central Anti Drugs Squad (CADS) batch hnihna chu July 7, Thawhṭanni tlai khan CYMA Hall-ah lak luh an ni a, member mi 42 an awm.

CADS 2nd batch lak luhna inkhawm hi CYMA vice president Prof. Lalnuntluanga'n a kaihruai a; CYMA president Lalhmachhuana chuan, CADS member tharte chu ram leh hnam chhan duhna tak tak pu chunga rinawm taka ruihhlo do hna thawk turin a chah.

CADS batch hnihnaah hian member turin Aizawla YMA branch hrang hrang aṭangin mi 42 ruat an ni a; convener chu CYMA assistant secretary Fabian Lalfakawma a ni. Assistant convener leh secretary pahnih an awm bawk.

CADS batch khatnate chuan March 15, 2025 aṭanga June 30 thleng an thawk a, July 2025 aṭangin batch hnihnate'n hma an la ve leh dawn a ni.