Alia Bhatt bumtu a assistant hlui man

Bollywood star, Alia Bhatt personal assistant hlui, Vedika Prakash Shetty, kum 32 mi chu man a ni a. Bhatt production company - Eternal Sunshine Productions Private Limited leh Bhatt mimal account aṭangin Rs nuai 77 vel a la nia puh a ni.

Vedika Shetty hi kum 2021-2024 khan Bhatt personal assistant-ah ṭangin, a financial documents leh payment te a enkawl sak a, a programme-te pawh a duansak bawk. Hemi chhung hian bill lemte siamin Bhatt hi a sign tir ṭhin a, hei bakah Alia Bhatt signature anga lo sign ve bawkin a sum tam tham tak hi a lo ruksak a ni tih police-te chuan an sawi. Bhatt hnenah hian a sum lak chhuahte chu a zinna, meeting leh hemi kaihhnawih atan tiin a hrilh ṭhin. Mahse Alia Bhatt-i nu, Soni Razdan chuan kumin January thla khan Vedika Prakash Shetty lakah hian a fanu bum a, a sum tam tak a lo ruksak avangin complaint a thehlut a, thla nga dawn an zawn hnuah manin Thawhlehni khan Bengaluru court ah hruai a ni.