China Billionaire Top 10 list-ah Labubu Doll siamtu lang

Khawvel ram hrang hranga lar leh an buaipui mek, Mizoramah pawh kan hriat lar tak, Chinese plush toy monster elves, Labubu doll chu an hralh chhuak nasa bawk a, a siamtu Pop Mart chairman leh CEO, kum 38 mi Wang Ning chu China Billionaire Top 10-ah a lang pha der tawh. Ning hausakna hi nikum June aṭanga kumin June thla chhungin a let liin a pung hman a, USD tld 22.1 hu a nei tling tawh a ni.

Labubu hi Hong Kong - Belgian designer Kasing Lung-a'n illustrated series 'The Monster' atan Nordic thawhthu behchhana a siam a ni a, kum 2015 khan a hmasa ber atan a lehkhabuah a lang a ni. Hemi hnu hian Pop Mart chairman leh CEO Wang Ning chuan he lemziah hi nautelemah rawn siamin, kumina khawvela doll buaipui ber a rawn ni thei ta.

Kum 2023 khan Labubu doll hi Pop Mart blind box format kaltlangin commercial market-ah zawrh chhuah ṭan a ni. Blind box-a siam a nih avangin a leitute tan pawh a eng ber nge an lei tih a hriat nghal loh a, unboxing boruak pawh a tih nawm phah hle ṭhin.

K-pop star BLACKPINK member Lisa chuan 2024 khan Labubu doll a ngainat thu leh, a zinnaah pawh Pop Mart a zawn ṭhin thu a sawi a, hei hian a ti lar zual a. Khawvel mi lar Rihanna, Dua Lipa leh Kim Kardashian te pawh he doll nen hian hmuh an ni ta fo a ni.

Pop Mart North America enkawltu, Emily Brough chuan kum 2024 khan Labubu hralhna aṭangin USD mtd 419 an hmuhchhuah thu sawiin, a kum -hmasa aiin 726% in a tam a ni. Labubu hi Asia, Europe leh United States-ahte a lar chak hle. Tun hnai khan Labubu doll lian chi chu Beijing-a auction house-in a li lam a, Yuan mtd 1.08 (USD 150,275.51) in an hralh.