Post Malone Nirvana tribute concert $mtd 2.8 a lalut

Post Malone chuan Zirtawpni khan Nirvana tribute concert neiin, a concert lai hi livestream-in a pe chhuak a, YouTube-ah chuan mi nuai sarih chuangin an thlir.

Malone hian kar hmasa khan livestream concert a nei dawn tih leh Nirvana hla eng emaw zat a sa dawn tih hi a lo sawi lawk tawh a, hemi aṭanga a sum hmuhchhuahte chu coronavirus relief fund atan a pe dawn tih a sawi bawk.

Blink 182 drummer Travis Barker chuan Malone hi pui bawkin bassist Brian Lee leh guitarist Nick Mack-te nen an chenna in aṭang ṭheuhin livestream hian show hi an buatsaih a; minute 80 vel lai concert hi an nei a ni.

Nirvana hla lar tak tak eng emaw zat an sa a, chung zingah chuan 'Come As You Are', 'About a Girl', leh 'Heart-Shaped Box'-te pawh a tel.

Malone hian $mtd 2.8 chuang a hmu chhuak a, Nirvana frontman-in a nupui a thihsan tak Courtney Love pawhin Malone concert buatsaih chu a fak hle nghe nghe. Nirvana bassist Krist Novoselic pawhin twitter katlangin Malone leh Barker-te hmalakna chu chhuanawm a tih thu a sawi ve bawk.

Google chuan Post Malone leh a ṭhiante sum thawhchhuah hi a thawhbelh dawn a, $mtd 5-ah chantir dawnin hei hi World Health Organization tan United Nations Foundation's Covid-19 Solidarity Response Fund-ah chhun a ni ang.

Post Malone hian quarantine hun hmang ṭangkaiin album thar a buaipui mek tih a sawi.

A theih anga hmain a album chu tihchhuah a tum tih leh a phur tawh hle tih a sawi a, an music buaipui mek chu a chhuang hle tih concert chawlhlawk an neih laiin a sawi a ni.

Malone hian a album thar ber 'Hollywood''s Bleeding' tihlarna turin kumin chhung hian tour neih a tum a, mahse hripui leng vangin tour hi a ṭhulh a ni.