Tourism Ambassador atan 'Aura farmer' ruat

Indonesia-a lawng inkarsiak neihnaa lawng hmawra lam awt awt, khawvel puma a video viral ta chiam, Rayyan Arkan Dhika, 'Aura farmer' tia internet lamin a hming a vuahsak tak chu Riau Province chuan Tourism Ambassador atan a ruat.

A lam dan 'viral' chuan mi tam tak a ti hlim bakah, amah pawhin a hlawkpui dawn ta. Tualchhung thuneitute chuan a lehkha zirna senso atan scholarship, Rp mtd 20 hu an pe dawn bawk. Rayyan Arkan Dhika hi kum 11 niin pawl nga zirlai a ni a, a video viral kha Indonesia-a Pacu Jalur festival an neihna ami a ni a, Dikha hi lawng hmawra lawng kartute lo fuih leh chawk phurtu tur, Togak Luan ah a ṭang. A lamna video a viral hnuah mi hrang hrangin a lam dan an zir a, IG reels leh TikTok lam a luah hneh hle, clip siam zingah hian mi lar tak takte pawh an tel. French football club Paris Saint-Germain pawhin a lam dan anga an lam lai TikTok clip ti chhuakin caption-ah "His aura made it all the way to Paris." tih an hmang a, ni 10 chhungin view mtd 7 a tling nghal.