Aengi & Rosalyn ten 'Kumtluangin' cover

Ṭhazual Award 2024 best duo Aengi & Rosayln te chuan Kyusho Waza hla lar Kumtluangin an cover a, zanin dar 8:00 hian an youtube channel 'Aengi&Rosalyn'-ah a en theih ang.

Aengi & Rosalyn te hi Ṭhazual Award-a 'backing vocalist' angin hriat a hlawh a, hriat an hlawh lehzual chu kum thum liam ta khan Ṭhazual Award-ah bawk Daduhi hla 'Ka ngai zual ṭhin' an rawn cover khan a ni.

Republic Veng ṭhian dun pahnihte hian sawmtu pawh an nei ṭha a, event hrang hrangah an zai hnem hle. Tunah pawh hian Zozam Session te nen August thla thleng programme a khat vek tawh a, restaurant leh cafe hrang hrangah an perform ṭhin.

Aengi & Rosalyn te hi kum 2018 daih tawh Zozam Session te nen an gig ho ṭhin a, tun ṭuma pawh hian an thawk ho. Zozam session te hi Ruatfela Renthlei (Guitarist), Bruce Pachuau (Bassist), Rinzauva Khiangte (Keyboardist) leh Malsawma Bawihtlung (Drummer) te an ni. Aengi chuan, "Kumtluangin tih hi mawi kan ti a, kan aw nen pawh hian a inrem ve viauin kan hria. Hla phal taka min sak min phalsaktu Kyusho Waza chungah kan lawm hle," tiin Vanglaini a hrilh a, 'rap' lai an tel loh tur thu a sawi thung.