Musician hmeichhe zinga sum lalut hnem Taylor Swift
Celeb zinga sum lalut hnem ber a ni a, a mak hran lo. Taylor Swift chu music khawvela hmeichhia zing≠ah sum a lalut hnem ber tih Forbes chuan a tarlang. A hmaa Forbes-in celeb zinga sum lalut hnem ber a tarlanah khan mipa pawhin sum lakluh hnem lama an tluk loh kha a ni.
Woman in Music 2016-a sum lalut hnem Forbes-in a tarlanah hian Taylor Swift hian USD mtd 170 lalutin sum a lalut hnem ber a, sum lalut hnem pahnih nena an inthlauhna pawh a tam hle a, pa≠hnihna Adele aiin a sum lakluh hi a let deuh thawin a tam zawk.
Swift-i sum lakluhna lian ber chu 1989 world tour kha a ni a, khatah khan USD mtd 250 zet a hmuchhuak a, heng zinga maktaduai 200 hi chu North America aṭanga a lakluh a ni. Hei mai hi a ni lo a, sumdawnna kawng hrang hrangah a inzep nasa hle bawk. Keds, Diet Coke leh Apple te nen sumdawnna lamah an inzarzawm. A sum lakluhna lian dang leh chu a album hralhna aṭangin a ni a, a album maktaduai 3 vel zet a hralh.
Sum lalut hnem pahnihna chu Adele a ni a, thla 12 chhungin USD mtd 80.5 a lalut. Adele sum lakluhna lian ber chu Swift nen a inang lo deuh a, album hralh aṭang≠in sum a lalut hnem hle. A album '25' kha kum 2015 chhunga album hralh hnem ber a ni.
A upa tawh viau nachungin music khawvelah chuan Madonna hian a vanglai a hmang mek zel. Hmeichhia, music khawvela mite zinga sum lalut hnem tarlanah pawh hian pathumnaah a lang pha a, thla 12 chhunga a sum lakluh chu USD mtd 76.5 zet a ni. Ani pawh hi Swift ang bawkin tour aṭangin sum a lalut hnem a, North America, Europe, Asia leh Australasia-ah te concert tour a nei.
Rihanna chuan USD mtd 75 lalutin sum lalut hnem palina a tling pha a, a sum lakluhna lian chu sumdawnna kaihhnawih - Dior, Puma, Samsung leh Stance te nena an sumdawnna aṭangin a ni ber a, a album ANTI pawh a hlawhtling tho. Beyonce-i chu panganaah a lang pha a, USD mtd 54 a lalut.
Sum lalut hnem dangte
6. Katy Perry ($mtd 41)
7. Jennifer Lopez ($mtd 39.5)
8. Britney Spears ($mtd 30.5)
9. Shania Twain ($mtd 27.5)
10. Celine Dion ($mtd 27)