Fashion Fiesta Zawhna leh chhânna
Pathian khawngaihna azarah he Fashion Fiesta column hi kum 3 lai mai ka lo ziak ve ta reng mai a, ṭhenkhat tan ninawm chang leh hriatthiam loh chang tam ṭhin hle mah se ṭhenkhatin an hlawkpui tih ka lo hria a, khawii maw chhuahvahna hmunah te fakna awka chu thuhran, tam takin an lo hman ṭangkaizia min hrilh lek phei hi chuan hei aia hlawkthlak zawka he page hi hman theih dan ka lo ngaihtuah ve ngar ngar ṭhin. A tui lo leh a ning chuan han ziak kur dup mah ila an ngainat phah lem chuang lo. Chuvangin tun ṭum chu a vawi khatna atan tih ngai loh thil mi ṭhenkhatin a an hlawkpui deuh tur rawn hlui che u kan tum ang e. Khawii maw kalna leh in lama ka phone-ah te min rawn biaa min zawt ta chawt chawt pawh ka tawng awl lo, chuvangin mimala kan inhrilh sen loh hi hemi hmang hian chhanna pek che u ka lo tum dawn nia. Lo hmang ṭangkai leh hluttu an awm tam zel dan a zirin thla khatah vawi khat emaw a aia tam pawh in thil hriat duhte (fashion lam kaihhnawih eng pawh) chhan che u ka lo tum dawn nia. Tun ṭum chu kum thum kaltaa zawhna ka dawn hnem deuhte leh ṭhalaiten tunhnaia min zawh tam ho enchhin dawn ila.
1) Mas dawn hian simple thei ang bera inchei ka duh si a, puan plain bih ngei ka duh bawk sia, eng colour nge ka bih ang a, chuan eng lampang design nge hak ṭha ang?
8729986519
- Design vul chûk ngaina ai hian a duh simple a te hi a khirh leh design-sak harsa an ni zel a, chuvangin kumin chu thawmhnaw lam, a puanthana nasa deuh hlek ziarang nei, a par i ngainat chuan a puan fan chhah lam ni thei se. A nih loh leh tunlai kan uar, Desi vai style deuh hleka ziarang nei deuh chuai ang te leh velvet-a a tle, a ziarang nei ang chi te hi a pum tawpin design vak awm lovin lo ha tawp mai la, a rawng mil tur puan plain chu lo bih ngei la, i pianhmang i sawi lem loh avangin hei aia detail hian ka chhang thei lo che a, ti hian i zawhna ka chhang chuan ka inhria.
2) Khua a vawt tawh sia, muffler ka awrh duh bawk sia, engtin nge ka inchei ang? Chunky pheikhawk hi eng kawr design nen nge inrem ang?
8794303471
- Muffler hi khua a vawh poh leh awrh a inthlahrunawm loh ting mai a, chuvangin i awrh duhna i rawn sawi chiah bawk si lo va, ti hian Biak Inah Pathianni leh puipun ni angah te formal dress nena i ti duh anih chuan a phiar chhah pup lo, simple si, i kawr rawng mil, a bikin a dum leh taksa rawng te hian rem a ngah. Chung chu Overcoat nen te pawh lo awrh ta la, ni tin chhuahvah College emaw Office thil angah erawh chuan khua a vawt chho ta bawk a, a lum phiar lam te pawh awrh tawh mah la a inthlahrunawm loh. A bikin i thawmhnaw hak kha (solid colour) rawng plain tawp te anih chuan a râng leh ṭial deuh hlek awrh te khan mi a ti inchei. Tawi deuh hlek tan hlai lutuk awrh loh ni se. Ria sang lam tan erawh chuan a sei leh chhah hlai lam kha chu a inthlahrunawm lem loh.
Chunky Heels hi Pathianni anih chuan puan bih nen chuan a mawi thei vek ti ila, tunlaiin kan uar bawk a, amaherawhchu boot bikah a heel chunky anih chuan kekawr zuih tak nen chuan a inhmeh lutuk lo phawt, a bikin thau tawi lam i nih phei chuan. Bakah kekawr arh deuh hlei hluai hakpui nan erawh a heel khuh vekin bun la a nalh phian.
3) Thlasik lai hian eng ang sam rawng hi nge nalh ang?
Mawimawii
- Khawvawh lai hrim hrimah hi chuan a langsar, rawng tak leh lar lam te, thawmhnawah a ni emaw samah emaw pawh a lang mawi zual. Vun rawng a pawimawh hmasa. Tlema nasa deuh duh tan Grey (pencil rawng) var dawn ṭep ombre emaw balayage-te in put ngam chuan a mawi phian. Hei aia la langsar leh duh tan a sen lar lam rawngkai ombre thoin a nalh phian ang a, tlema vun eng deuh hlek tan a buang deuh thar lam te leh mi tih loh dan zawng hrim hrim tan balayage technique-in ash blonde aṭanga senno, dal deuh hlek te pawh lo tichhin la, a ngam tan chuan a mawi khawp ang.
4) Nutling hnute lian bawk si, dar tÍ bawk si, banbul lian leh daih si, dulkiar lam tan hian eng hi nge an mawipui ber ṭhin?
8014448582
Thau deuh lampang, ria chum, dar tÍ, banbul lian, a hmawr lam zuih, dar pial awih kum deuh tan hian eng ang thawmhnaw nge nalh ang?
Aries Girl
- Thawmhnaw ṭhui a tu a pawh mai hian hetiang pian hi chu ṭhui harsa kan ti tlang a ni ber e. Dar tê hrim hrim hi a hmei apain chei an har tlangpui ṭhin a, chutah a lo awih a, a lo kum viau phei chuan ṭhui buaithlak chu thuhran readymade-ah pawh zawn fe a ngai ṭhin. A hmasa berin ho deuh, awlsam si chu kawr dar liam hak loh phawt a him ber. Ban bul lian an nih phei hi chuan a dar puk emaw a ban bul lam ti lang lian thei chi design nei hi chu hak loh hram ni thei se. Hnute a lo len phei chuan Kurta ang style-a kawng lak rêk ve det, mawng lai vel thlenga fualte hi Pathianni thawmhnaw ni lovah chuan an mawipui berin ka hria. A ban pawh hi bul lovin kiu khuh vel ni thei se. A tak a par leh ziarang nei anih chuan a banah khan puan plain te hmang daih ila, ban bul lang lian lutuk tur a tiziaawm. Dulkiar in rawn sawi tel avang hian puipun ni atan bik mar ṭeng ṭung ni lovin puan pianhmang langsar lutuk ang chi leh a pan lam te avoid ni se, tlema chhah fân det ho hian taksa a vawng a, kan lang mawi duh phian a nia. Ṭhenkhat dulkiar thup nana a kawnga design siam vak emaw, kâwng zai rêk loh kan inbel hian kan dulkiar a ti lang zawk daih a ni. Chuvangin, a cut dante kha kawng tilang fek thei tura cut sawm ni se. A kawng bul hnaiah design siam tam lo bawk ila a fuh ber.
Heng bakah hian zawhna ṭha tak tak chhan chakawm tak tak la awm nual mah se kan hun leh hmunin a daih miau loh avangin hun dangah kan inchhang leh zel turah ngai ang. Eng pawh fashion lam kaihhnawih hriat zau emaw harsatna i nei anih chuan hemi no. 7005334927-ah hian SMS thawn mai ni se.
Tluangpuii Hmar
Instructress
Vakiria Institute of Fashion Technology