UFC 205 McGregor-a ropuizia kan hmu

New York khawpuia Madison Square Garden-ah, keini rama Pathianni zing khan UFC 205 khelh a ni a, mipui ngaihven ber Conor McGregor chuan a khingpui Eddie Alvarez chu round 2-naah chiang taka knock out-in, UFC history-a ṭum khatna atan champion belt pahnih a hreng kawp.

Irish pa rothap McGregor hi kawng engkimah a chungnung zawk a, round khatna an khelh chhungin a khingpui Alvarez hi vawi hnih a hnek tlu hman! A vawi khatnaah hian McGregor-a kut ranzia kan hmu a, second reilote chhungin a khingpui hmaiah chiang takin vawi hnih a hnek hman a, Alvarez a tlu chiang hle. McGregor hian a kut leh ke a hmang thiam em em a, a khingpui deusawh ni awm taka kut hnung a suih lai chuan mipui thawm a ring hle. A tumpui Alvarez hi ṭum hnih a tluk hnuah thochhuak leh bawk mah se, round hnihnaa McGregor-a kut tum a dawn erawh thawhchhuahpui chi rual a ni tawh lo. McGregor hian phu takin lightweight champion kawnghren a hreng ta a ni. Eddie Alvarez hi an inbeih hma hian lightweight champion lai a ni a, a beih tawh mi 28 hnehin, vawi li a tlawm tawh. Hetihlai hian a khingpui McGregor hian mi 20 hneh tawhin, mi pathum lakah a lo tlawm ve tawh bawk.

Inbei dangah Tyron Woodley chuan Stephen Thompson a hneh a, Womenís Strawweight-ah Joanna Jedrzejczyk chuan Karolina Kowalkiewicz chu unanimous decision hmangin a hneh bawk. Inbei hmuhnawm takah Chris Weidman chuan a khingpui Yoel Romero chu TKO-in a hneh a, Miesha Tate erawh Raquel Pennington lakah a tlawm thung.

Featherweight-ah Frankie Edgar chuan Jeremy Stephens chu a hneh a, Michael Johnson hnehin Khabib Nurmagomedov chu Lightweight champion thar a ni. Middleweight-ah Tim Boetsch chuan Rafael Natal a hneh a, Belal Muhammad hnehtu Vicente Luque pawh Welterweight champion thar a ni. Catchweight-ah Thiago Alves chuan Jim Miller lakah hnehna a chang zo lo a, Katlyn Chookagian hnehtu Liz Carmouche chu Womenís Bantamweight champion thar a ni bawk. UFC 206 hi kumin December-ah khelh leh a ni ang.