Eric Martin a rawn thleng Zaninah a che tawh dawn

Eric Martin

ρ Kum 1960, October 10 khan Long Island, New York ah a piang

ρ A hna thawh hmasak ber chu vur zawrh (Ice cream) a ni

ρ A tleirawl vel lai aṭang tawhin music hi a tuipui nghal a, sikul leh ṭhianho angin band siamin a lo tei kual ve nasa hle ṭhin

ρ Kum 1988 khan Billy Sheehan, Pat Torpey leh Paul Gilbert te nen Rock band Mr.Big an din

ρ An album “Lean into it” chu Mizoramah pawh
ṭhalaiten kan lo sukpui nasa hle

ρ He albuma an hla “To be with you” tih phei chu Mizo ṭhalaiten a hla rem thiam kan tum nasa ṭhin hle

ρ "To be with you" hi khawvel ram 15-ah Number 1 a kai pha a, rimawi khawvela mithiamte chuan hla pakhat avanga mi hriat hlawhte an sawina ṭhin “One hit wonder” ah pawh an telh fo ṭhin reng

ρ Mr.Big hi kum 2002 khan an inṭhendarh

ρ An inṭhen darh hnu hian Eric Martin hi The Voice of Mr.Big tih chu a pu tlang ta zel

ρ Kum 2007 khan Shillong Polo Ground-ah concert neiin mi 20,000 chuang an pungkhawm

ρ Mr.Big hi tunah inzawmkhawm leh tawhin, kum 2017 hian World tour neih an tum

Mr. Big vocalist Eric Martin chu nimin khan Aizawl a rawn thleng a, mi ṭhahnem takin Lengpuiah an hmuak. Eric Martin pual hian nizan khan Siby Farm-ah zanriah ei a ni a, hetah hian Mood Swinger te an perform.

Eric Martin hi Tribal Art Centre, Tanhril-ah zanin hian a concert tawh dawn a, tlai dar 5:00 aṭangin ṭan tur a ni. Eric martin inlan hmain Rosy K. Remsangpuii, DJ Lalvenhimi, Triau Trackx leh Boomarang ten opening act an chang. Ticket hi ZOfood (Near Vanapa Hall), Red Pepper (Chanmari), Y2 Goal Agencies (Chanmari), leh CD Trade Centre (Chanmari)-ah te an zuar.

Concert buatsaihtu ZO Events & Management chuan concert-na chhungah camera leh ruihtheih thil ken luh an phal dawn lo a, security pawh an khauh hle dawn. Official photographer erawh an awm ang. Lirthei kengte tan FCI Kudam
aṭangin kawngpui sirah motor a dah theih dawn a, amaherawhchu concert-na hmun pan thlakna chhuk thlaah erawh chuan official lo chu eng motor mah luh thlak phal a ni lo ang.

Eric Martin hi Gangtok-ah a concert tawh a, Aizawl-a a concert hnu hian, Ningani khian Imphal-ah a zai ang a, Zirtawpni khian Guwahati-ah a concert leh ang. India-a a chet hnuhnun ber tur hi Shillong-ah a ni a, Inrinni khian Polo Ground-ah a perform ang.

India-a a chet hnu hian US-ah a chhuk thla ang a, December 2 khian Houston, Texas-ah a concert ang a, chumi hnuah Europe a kai leh dawn a ni.