Billboard 200: 'JACKBOYS 2' in I'm The Problem nek chhuak ta

Travis Scott leh Hip-Hop group Jackboys thawh dunna album thar 'JACKBOYS 2' chuan hun rei tak chart thununtu, Morgan Wallen chu No 1 aṭangin an nek chhuak ta.

'JACKBOYS 2' hi July 13 khan tlangzarh a ni a, Wallen album hit vang lai tak nangin chart-ah hian a lang nghal lo a, mahse beisei lawk ang ngeiin chart thar a rawn thunun thei nghal a ni.

Travis Scott & JACKBOYS album 'JACKBOYS 2' hi kum 2019 a tih chhuah tawh JACKBOYS album chhunzawmna a ni. He rap group hi Travis Scott din niin, member hi Sheck Wes, Don Toliver, leh Chase B-te an ni. Album hian equivalent album unit 232,000 a nei phak a, rap album chhuak tawhah 'second biggest debut' niin Travis Scott album 'Days Before Rodeo' 2024-a mi chiah a phak lo

Pahnihnaah hian Justin Bieber album thar 'Swag' awmin tlangzarh karah equivalent album unit 163,000 a nei pha. 'Swag' hi JB-a studio album pasarihna a ni a, kumli chhung ngawt album a tih chhuah loh hnua a tih chhuah leh hmasak ber a ni bawk. Kar riat chhung zet a zawna No.1 a hauh hnuah Morgan Wallen album 'I'm the Problem' pawh pathumnaah a tla thla a, mahse equivalent unit 147,000 a la nei pha tho a ni.

Kum 16 dawn hnuah Clipse chuan an album thar 'Let God Sort Em Out' ti chhuakin No 4-ah a awm a, KPop Demon Hunters 'Soundtrack' pawh a kar linaah Top 5 ah a la awm bawk.