Wonder Woman 3 an buaipui ṭan der!

DC Fan-te tan thu thar lawmawm a awm leh ta. Tuna hmuhnawm titaka an en mek hlawm Wonder Woman 1984 chhunzawmna tur Wonder Woman 3 siam turin hma an la leh ṭan der tawh niin khawthlang lam media te chuan an tarlang.

Helam chinchang hre rang ṭhin tak Variety chuan hemi chungchang hi tarlangin, Warner Bros lam hotute chuan Gal Gadot ngei a chang leh dawn tih an sawi niin an tarlang a, director tur pawh tudang ni loin Patty Jenkins bawk a ni leh dawn, an ti.

Warner Bors chief Toby Emmerich chuan hemi chungchanga a thusawi hi Variety chuan an tarlang a ni. Tunah hian khawvel hmun hrang hrang a theatre thlan bikah leh HBO Max-ah WW 1984 chu en theihin a awm mek a, en tawh pawh kan awm nualin a rinawm a, a end credit scene zulzui kha kan hmu dawn nge hriat a chakawm tawh hle.