Bullet bike hmanga India fan chhuah tumtu Tapsi Upadhyay

'Mission Healthy Bharat' tia Bullet bike hmanga India ram fan chhuah tumtu nula Tapsi Upadhyay chuan nimin khan Health Minister leh Aizawl SP te an pisaah a kâwm bakah, Aizawl Press Club-ah thuthar thehdarhtute a kâwm.

'B.Tech Pani Puri Wali' tia sawi ṭhin Tapsi hian ṭhalaite hriselna bakah, nungcha leh leilung humhalh a pawimawhzia chu India ram state tin (28) leh union territory tin (8)-ah tlangaupui a tum. Kum 23 mi niin, 'Mission Healthy Bharat' hi kumin March thla khan an khua, Meerut, Uttar Pradesh aṭangin a ṭan a, Mizoram nen state pakua a tlawh tawh a, Mizoram aṭangin Imphal, Manipur a pan ang.

Tapsi hi Tripura aṭangin Mizoramah a rawn lut a, Mamitah St. Francis Assisi H/S leh DIET bakah, Bawngvaah zirlaite hnenah awareness campaign a nei nghal. July 27, Pathianni tlai khan nikuma thirsakawr hmanga India ram fang chhuaktu Vanlallawmzuala Ralte, Mission Veng chu an inah tlawh chhuakin an inkâwm.

Tapsi hian nimin khan Health minister Lalrinpuii leh Aizawl SP Rex Zarzoliana Vanchhawng chu an pisaah a hmu. Thuthar thehdarhtuten an kawmnaah Tapsi chuan, Mizote zingah nun dan uluk loh vanga natna neih theih - HIV, cancer, stroke, heart attack te a hluar nia a hriat thu a sawi a; heng natnate hi kai lo turin nun dan hrisela awm tur te, ei leh inah fimkhur tur te, taksa sawizawina lam ngai pawimawh turtein Mizo mipui a chah a ni.