AMC-in Miss Grand India 2025 lawmpuina hun hmang

Aizawl Municipal Corporation chuan nimin Ningani khan Miss Grand India 2025-a 1st Runner Up Vanlalnuntluangi, Ṭhuampui Veng lawmpuina leh chawimawina hun an hmang.

AMC auditorium Ṭhuampuia hun hmanah Aizawl Mayor Lalrinenga Sailo chuan lawmpuina thuziak leh pawisa Rs 100,000 a hlan a, Vanlalnuntluangi chu ṭhalaite tan entawn tlak tia fakin Aizawl tihmingṭhatu ni chhunzawm zel turin duhsakna a hlan.

Vanlalnuntluangi hian AMC-in an ambassador atana sawmna chu a pawm a, lawmpuina hlan zawhah Ṭhuampui Local Council leh Republic Veng Local Council huamchhunga bawlhhlawh ṭawih thei khawnna tura ruahman, Garbage Truck a vai liam nghal.

Miss Grand India 2025 1st Runner Up lawmpuina leh chawimawina hun hi Joseph H. Lalramsanga, Municipal Commissioner in a kaihruai a, Executive Corporators, Corporators, AMC Officer & staff te leh Ṭhuampui Veng Local Council leh NGO ten an telpui bawk.