Jujutsu Kaisen-in World Record siam

Japanese anime series lar, Jujutsu Kaisen chu Guinness World Records 2025 chuan khawvela animated TV show entu ngah berah a puang.

Jujutsu Kaisen hian hun reitak chhung entu ngah lama hmahruaitu 'One Piece' leh 'Attack on Titan' te chu a khum ve ve thei a ni. Jujutsu Kaisen series season thar, kumin July-a an tih chhuah leh aṭangin entu hi nasa takin an pung a ni. Data science firm Parrot Analytics-in a tarlan danin Jujutsu Kaisen hi khawvel puma a demand rating chu TV show pangngai aiin a let 71.2-in a tam zawk. Parot Analytics chhut danin video streaming leh download aṭang te, social media a hashtags, like leh share bakah IMDb kaltlanga zirchianna neih aṭanga chhutin entu an tam ber a ni..

Gege Akutami manga series behchhana siam, Jujutsu Kaisen hi high school zirlai Yuji Itadori-an Jujutsu Sorcerers pawl zawm a Sukuna hneh tuma a beih dan chanchin a ni. He series entu zingah Gen Z (kum 13-22) chu 71.3% an tling pha a, hetih laiin Gen Z zingah One Piece entu hi 56.7% leh Attack on Titan hi 64% in en ve bawk.