Lemchan thiam Irfan Khan a thi

Irfan Khan hi Thawhlehni khan colon infection vangin Kokilaben Ambani hospital-ah kalpui a ni a, ICU-ah dahluh nghal niin, nimin khan a thi ta a ni. A hma pawhin a hriselna lamah hian harsatna a lo tawk fo tawh a, kum 2018 khan neuroendocrine tumour vangin enkawl lo ni tawh bawkin, nikum pawh khan ram dangah thla eng emaw zat enkawl a lo ni tawh bawk.

Kum 1995 khan Sutapa Devendra Sikdar nen inneiin fa pahnih an nei a, kum 2011 khan India chawimawina sang Padma Shri hlan a lo ni tawh bawk a ni.

Irfan Khan hi January 1967 khan  Jaipur, Rajasthan-ah piang­in a pa hi motor ke hmanga sumdawng ṭhin a ni, amah hi cricket thiam tak a ni a,  CK Nayudu Tournament (First Class cricket atana kawng pawimawh tak) a khel tur thlan chhuah zingahte pawh tel tawhin sum neih loh vangin a kal lo a ni.

National School of Drama (NSD), New Delhi chuak a ni a, kum 1984 khan NSD aṭang hian a pass chhuak. A nupui Sutapa Devendra Sikdar pawh hi NSD graduate tho a ni bawk.

Irfan Khan hi Bollywood actor zinga thleng sang ber pawl a ni awm e. Bollywood mai ni lo Hollywood lamah pawh a hmel hmuh tur a awm leh zeuh ṭhin.

Kum 1988-a tihchhuah Salaam Bombay! kha film-a a inlanna hmasa ber a ni a, hemi hnu hian film eng emaw zatah inlanin film 50 dawn a chang hman. Hollywood movie Slumdog Millionaire, Life of Pi,  Jurassic World  leh The Amzaing Spider-Man-ahte pawh khan a inlan a, heng bakah hian international film dang eng emaw zat inlanna a nei.

Thla hmasa lawk pawh khan a film channa Angrezi Medium (English Medium) chu tlangzarh niin hei hi a film channa hnuhnung ber a ni ta a ni. 

A lemchan thiam avang hian chawimawina a dawng hnem hle. Kum 2018 khan Hindi Medium vangin Filmfare Awards Best Actor leh International Indian Film Academy Awards Best Actor-te pawh a dawng hial.

Dubai International Film Festival-ah pawh Honorary Award-te pawh a lo dawng tawh a, Slumdog Millionaire vang khan Screen Actors Guild Award pawh hlan a lo ni tawh bawk.

International Indian Film Academy Awards, CNN-IBN Indian of the Year leh award dang eng emaw zat a dawng tawh a ni.