K Hminga hla thar 'Duhaisam'-in duhthu a sam

'Siar Lanu' hmanga thiam tak taka Zofate min awitu K Hminga chuan Thawhlehni khan hla thar 'Duhaisam' a tichhuak a, a zai ngainatute tan he hla hi duhthusamin a nalh tih loh rual a ni lo.

Music video siam zen zen lo K Hminga hian a hla thar hi a dan pangngaite bawkin 'lyric video'-in a YouTube channel-ah a dah chhuak leh a, a ngaite bawkin ngaithlatu an pung chak leh hle. Social media lama share-tu pawh an tam chho leh hle a, a hla tihchhuah apiang a hit emaw tih mai tur a ni a, 'Duhaisam' pawh hi kar loah mi nuai chuangin an ngaithla lehnghal dawn tih a chiang.

'Duhaisam' lyric video hi a lyric video dang leh 'Tunge inthlei thei?' music video siam saktu William Lalrindika buaipui sak leh tho a ni a, ani hi a kut hnu a mawi ṭhin a, a 'simple' in en a nuam ṭhin.

He hla hi ngaih­zawng atan duhthusam kan neih ṭhinzia tarlanna niin, hmelṭha, pian nalh leh mifel kan zawng ṭhin. Mahse mihringah duh­thusam anga ṭha famkim a awm theih loh a, chuvang chuan duhaisam tak tak zawk chu an tlin lohna hre reng chunga kan thinlung la hnehtute hi an nih zawk thu tarlanna hla a ni. 

K Hminga chuan a hla thar hi,"Val lung­mawl pakhat duhaisam ve mai a ni e," tiin Vanglaini a hrilh.

A guitar thiam vanga hriat hlawh ni pakhat K Hminga hian a hla thar music hi a uluk lehpek hle a, guitar solo mawi tak zep lehin a hla thluk leh music hi lunglenna chawk tho thei tak tur a ni bawk.

K Hminga hlate hi tunlaia Mizo hla lar ber pawl a ni deuh veka, a bikin rimawi lam tuipuitute'n an hlut zual ṭhin. 'Duhaisam' pawh hi nimin tlai thleng kha chuan YouTube-ah thlirtu sing thum chuang an awm leh tawh a ni.