Mizo Dance Camp founder Alan Lalrinawma vuiliam a ni

Mizo entertainment industry tana thawh hlawk tak, Mizo Dance Camp neitu Alan Lalrinawma (32) chu TB natna avangin August 5, 2025 zan khan a thi a, nimin khan St.Mary's Church, Electric Vengah vuiliam a ni.

Alan-a hi Andrew Lalsangzuala leh Lalneihzovi te fa pahnih zinga a upa zawk niin, college a kal lai aṭangin lam lamah a inhmang nasa a, MA zawh hnuah May 31, 2014 khan lam zirna, 'Mizo Dance Camp' a din a, hei hi mi tam zawkin kan hriat larna a ni. A ṭhianṭha tlem azawngte nen bul ṭanin, class an hawn bakah zirlai an la a, creative director anga awmin, a hnen aṭanga lam zir chhuak tam tak an awm tawh. Mizoram-a lam (dance) kalphung thara rawn chhem alhtu leh chawi nungtu pakhat a ni.

Mizoram entertainment-ah a inhmang nasa hle a, talent show leh intihsiakna hrang hrangah endiktuahte pawh a lo ṭang tawh ṭhin. Mizo Dance Camp hming hian show hrang hrangah a naute ho nen an inlan tawh a, chung zingah chuan Zonet Ṭhazual Award, Fashion Show, MSL Halftime Show, Taekwondo Fight League, Lelte Award, Anthurium Festival, Winter Fest, Youth Fest , Miss Mizoram, G-20 Summit, Guwahati Gupshup Music Award leh Coffee Nite te pawh an tel. Competition hrang hrangah a naute chu Zo Nation hmingin state dangah a telpui ṭhin bawk.

Alan-a hi kum 2024 October thla khan Ril TB a nei tih hriat chhuah niin, ICU-ahte pawh enkawl a ni. Mahse ṭha taka damdawi-in chhuahsanin faklam intihsiaknah chief judge ah a ṭang leh thei a ni. Hma a sawn chhoa a lan laiin August 3, 2025 zingah nikhaw hre loa awmin ICU-ah dah leh a ni a, ṭhat lam pan thei loin August 5 zan dar 8:20 khan Ebenezer Hospital-ah a thi ta a ni.