Ronaldo leh Georgina an inhual ta

Football superstar Cristiano Ronaldo leh hunrei tak a lo kawp tawh, model Georgina Rodriguez te chu an inhual ta. Georgina hian a Instagram-ah an inhualna zungbun hi a pho lang a ni.

Kum 40 mi, Ronaldo leh kum 31 mi, Georgina te hi Madrid khawpuia Gucci dawra intawng niin kum 2016 aṭang khan an inkawp ṭan a, kum 2017 January-a Best FIFA Footbal Awards kha vantlang hmuha an inlan dunna hmasa ber niin, hemi kum kumtawp lamah an inkawp thu hi IG-ah an sawichiang ta a ni.

An pahnih hian fanu pahnih an nei a, Georgina hian Ronaldo fa dang pathumte pawh a enkawl bawk. Georgina Rodriguez hi Argentina-a piang, Spain-a seilian a ni a, Ronaldo nena an inkawp hnuah khawvel hriat a hlawh a, amah a chhe lo bawk nen fashion house hrang hrangte a thawhpui chho a ni. A thawhpui zingah hian khawvel huapa brand lar - Gucci, Prada leh Chanel pawh an tel. Netflix-ah ama pualin series, 'I Am Georgina' nei bawkin,a mimal leh an chhungkaw chanchinte a tilang ṭhin.