Brad Paisley-a'n bomb puak tuartu hnenah guitar a pe

Country superstar Brad Paisley chuan Krismas ni taka bomb puak vanga chenna in chan, Nashville, Tennessee musician pakhat hnenah guitar a pe.

Nashville Second Avenue-ah Krismas niah tak khan thihchilh bomb a puak a, hetah hian mi pathumin hliam an tawrh bakah chenna in ṭhenkhat a tichhia a ni. Chung zingah chuan Brad Paisley-an guitar a pek Buck McCoy pawh hi a tel a, bomb puakin a apartment a tichhiat thu hi social media-ah a post nghe nghe a, hei hi Paisley hian lo hriain guitar hi a pe ta a ni.

McCoy hian social media kaltlang vek hian Paisley hnenah hian lawmthu a hrilh a, a duhthusam a taka thleng dik ang mai a nih thu sawiin a guitar dawn chu kumkhuaa a rohlu a nih tawh tur thu a sawi.

Kum 48 lai ni ve tawh 'Whiskey Lullaby' hitmaker hian Grammy award pathum lai a dawng tawh a, Academy of Country Music Awards leh  Country Music Association Awards phei chu 14 ve ve dawng tawhin album pawh copy maktaduai 11 chuang a hralh tawh a ni. Studio album 12 tichhuak tawhin kum 2017 khan a album hnuhnung ber  Love and War chu a tlangzarh a ni.