Kum thar niah WhatsApp hmang an tam

5th January, 2021

Kum thar tuk khan WhatsApp hmanga voice leh video call vaibelchhe 1.4 a awm a, hei hi ni khata WhatsApp-a voice leh video call tam ber ni a ni.

Hemi chungchangah hian WhatsApp neitu Facebook chuan nikum hmasa aia 50%-a WhatsApp hmangtu hi an tam thu an tarlang. Covid-19 hri leng vanga pawna chhuah a theih loh avangin in lam aṭanga kum thar chibai inhlanna a tam zual vangin kum dang aiin WhatsApp hmanga inbiakna hi a tam niin an tarlang bawk.

Kum 2020 ni tawp ber ni, December 31 kha US-ah chuan Facebook Messenger video call tam ber ni a ni ve thung a, Facebook chuan kum thar ni khan Facebook leh Instagram-ah live broadcast maktaduai 55 chuang a awm thu a tarlang bawk a ni.