Ṭhazual Lengzem-ah Marina Varte-in kumthar chart hmasa ber a hawng
Kumina Ṭhazual chart hmasa berah Mizo Idol star Marina Varte 'Nang kher ka lo tawn che' chu pakhatna a ni a, Feli Fanai 'Chhing mittui a hul zo ta' chu pahnihna niin KR Robert ft. Tuaisiala 'Ka lalnu' chu pathumna a ni.
Kum thar chart hawngtu Marina Varte
Folk song lam hla eng emaw zat a tihchhuah hnuah Mizo Idol aṭanga Zoramin kan hmelhriat zaithiam ngaihno bei tak Marina Varte chuan lengzem hla lungkuai tak 'Nang kher ka lo tawn che' a tichhuak a, a tihchhuah hnu lawk aṭangin chart-ah inlan nghalin tunah chuan pakhatna a rawn ni ta a ni.
Zaithiam H. Lalmuankimi leh Machawii Pachuau te hlaphuah 'Nang kher ka lo tawn che' hi Mizo rilrem zawng tak hla niin, tunhma deuha H. Lalmuankimi'n thiam taka a sak ṭhin kha a ni a, Marina Varte hian rawn thar thawh lehin music video mawi tak nen Zofate thlira ngaihthlak theih turin a rawn chhawp chhuak leh a, a hit leh hle.
Pahnihna Feli Fanai, Pathumna KR Robert ft. Tuaisiala
Demand channel lar vanglaia hla lar ṭhin tak 'Chhing mittui a hul zo ta' rawn thar thawh lehtu Feli Fanai chuan he hla ngei mai hi pahnihna a rawn nihpui leh ta a, chart hmasaah khan palina niin hma a rawn sawn hle a, a dinhmun a ṭha sawt hle.
'Suangtuahna neitu' hitmaker Tuaisiala leh KR Robert-a te hla 'Ka lalnu' pawh pangana aṭangin pathumnaah a rawn invawrh. Music Video hmuhnawm tak nena an rawn chhawp chhuah 'Ka Lalnu' pawh hi a dinhmun a ṭha chho hle a ni.
Chart top 10 an ṭha rual
Palina chu Awmtea Polymer ft Ramrami 'Hnungtawlh suh' kha a ni a, Jaui 'I hlutna' pawh top 5-ah a rawn inhlangkai ve leh bawk. Chart top 10-ah hian Sangkimi Khiangte, Ngurthansanga, Essy ft JT Production, Rachel Lalnunkimi leh Zorinzuali Khiangte te pawh an lang a ni.
Ṭhazual Lengzem chart top 10
1 Marina Varte - Nang kher ka lo tawn che
2 Feli Fanai - Chhing mittui a hul zo ta
3 KR Robert ft Tuaisiala - Ka Lalnu
4 Awmtea Polymer ft Ramrami - Hnungtawlh suh
5 Jaui - I Hlutna
6 Sangkimi Khiangte - Lianrikhumi Zai
7 Ngurthansanga - Chalmar zai
8 Esst ft. JT Production - Min ui lo mi
9 Rachel Lalnunkimi - Di ṭhen lunglen
10 Zorinzuali Khiangte - O