Lehkhabu bawm: 'Hmun Khawharah Pathian' tlangzarh

Tuikual North Branch Kristian Ṭhalai Pawlin an lehkhabu tihchhuah hmasa ber, F. Vanlalrochana ziah 'Hmun Khawharah Pathian' tih chu nimin khan Synod Cenference Centre-ah Central KṬP leader Rev. H. Lalawmpuia'n a tlangzarh.

Tlangzarh inkhawmah hian K. Lalpiangthara chuan hunserh hmangin, lehkhabu thlirlawkna hun Lalthlamuana Ralte in a nei a, Praise On 2024 Top 10 zinga mi, Saizampuii a zai bawk.

He lehkhabu buaipui tur hian Tuikual North Branch KṬP chuan Publication Sub Committee an din a, anni hian proof reading an neih bakah a ṭul ang leh buaipui ngai apiang an buaipui a ni. Frazer Media & Publication-ten chhutsakin, copy 5,000 chhut a ni. Pre Order pawh kalpui a ni a, mi ṭhahnem takin an order lawk tawh bawk. Lehkhabu hi Peniel, Solomons Cave, Zaumawi Electricals, Lower Zarkawt, Grip On Apparel, Millenium Centre, C&M Store, Bawngkawn, Grailkart, Tuikual, 1 AM, Dinthar kawnahte zawrh chhuah a ni dawn a, a man hi Rs 350 a ni.