XUV 3XO variant thar REVX tlangzarh

Mizorama Mahindra full range dealer Mana Motors chuan Nilaini khan an showroom, Bawngkawnah XUV 3XO REVX tlang zarhin, Dealer Principal Dr Franklin Lalrinngheta leh a nupui Lalawmpuii'n an khuh hawng a, chi hrang pathum awmin cheng nuai 8.9 atanga nuai 12.9 man a awm.

Mahindra & Mahindra chuan XUV 3OO tuai tharin April 2025 khan XUV 3XO tih hming puin a pho chhuak a, May 2025 atangin India ramah an hralh chhuak. Mahindra-in SUV a neih zinga a hralh hnem ber dawttu ni zuiin April 2024 atanga March 2025 chhungin 1,00,905 an hralh. Hmasawn leh zual turin XUV 3XO awm sa bakah variant dang REVX an tichhuak leh a ni.

Kawng hrang hrangah XUV 3XO pangngai aia mipui hip zawk tura duan a ni a, tunlai thiamna thar ber ADAS level 2 nena thuam a nih bakah, engine TCMPFI 1.2L, 110bh@200nm torque leh TGDI 1.2L, 130bhp@230nm torque pe chhuak thei a hmang.

Mana Motors hian Mahindra siam chauh ni lo, car hlui hrang hrang a tharin an thleng thei. LPS Vision an thawhpui mek a, August 5 atang khan 'Mahindra XUV 3XO Mizo Talent' buatsaih a ni a, August 30-a zawh tur niin zaninah top 10 intihsiakna neih a ni ang.