Kobe Bryant movie siam dawn

Warner Bros. Pictures chuan NBA legend Kobe Bryant, Los Angeles Lakers a zawm dan chanchin rintlak movie-a siam tur script a lei. Project hi screenwriter Alex Sohn leh Gavin Johannse- te kutchhuak niin, he thu hian studio leh streamer tam tak ngaihven a hlawh hle. Source pakhatin a tarlan danin, Warner Bros. chuan auction hmachhawnin, script hi an chang thei a, a movie hming tur chu 'With the 8th Pick?' tih niin an sawi bawk.

Bryant hian Lakers tan season 20 a khel a, vawi nga an champion bakah, Shaquille O’Neal leh coach Phil Jackson te nen early aughts-ah three-peat an la bawk. All-Star vawi 18 a lo ni tawh a, 2007-2008 season chhung khan league MVP atan thlan a ni. Kum 2016 khan kum 37 mi niin professional basketball a chawlhsan a, January 2020 khan Bryant hi helicopter chesualah passenger dang pariat nen an thi a, a fanu Gianna pawh a tel.